61. ДАННАЯ ГРАМОТА ПОСАДНИКА ВАСИЛИЯ СТЕПАНОВИЧА МОНАСТЫРЮ ИОАННА БОГОСЛОВА (1452)
61. ДАННАЯ ГРАМОТА ПОСАДНИКА ВАСИЛИЯ СТЕПАНОВИЧА МОНАСТЫРЮ ИОАННА БОГОСЛОВА (1452)
Грамота напечатана в «Актах юридических» № 110, VI.
Се даст посадник Великаго Новагорода Василей Степано-вичь, в дом святого Иоанна богослова, во обцей монастырь, на Пенешку, игумену Серапиону и всей братии, или кто по нем иной игумен будет у святаго Иоанна богослова, во общежителство, село Ковыцово, и со страдными землями[84] и с пожнями2, и другое село Овсяниково, со страдными землями и с пожнями, и третье село Лухановское, Степоньцово и Латозера половина, и с страдными землями и с пожнями; а межа той земли: по большой Пенешке реке въверх левая сторона, от устья и до верховья; от болшой реки Пенежки до меншей реки Пенежки въверх правая сторона, от устья и до верховья; а в гору межа до нагорной межи, или где ни будет тых сел земли и пожни, на Ваге и в Лумъозере, участки тых сел, и лешебныи лесы тых сел, и всякия ловища тых сел. Да еще есми продал остров Онтропьев весь, что есми у Обакума купил; а то церкви святому Иоанну богослову во обитель общежителство игумену, кто ни будет у святаго Иоанна богослова, и ввеки. А игумен, кто ни будет у святаго Иоанна богослова, держати ему общее житие; а чернцов игумену держати как его сила имеет; а чернцов игумену держати в монастыре кто игумену люб; а игумену и чернцем, живуци в монастыре святого Иоанна богослов, собин им не держати3, а пойдет игумен проць из монастыря, ино ему дати уцет чернцам.
А посаднику Василью Степановичу, ни его жене, ни его детем, не вступатися в тыи села, ни в тыи земли, ни в тыи ловища, ни в пожни, ни в остров Онтропьев, и ввеки, ни в чернцов, ни в страдники4 чернецки, ни в села чернецки, ни прикащиком посадницим Васильевым, ни слугам, ни христианом не вступатись ни во что ж монастырское, ни обидити. А кто почнет вступатись, или обидети, домовное святаго Иоанна богослова, по сей по данной грамоте, а на того бог и святый Иоанн богослов. А слуцится дело монастырскому человеку с посадницим человеком с Васильевым; ино судит игумен с посадницим с Васильевым прикащиком; а игумену половников посадницих Васильевых ни отхожих людей не принимати.