II. Письмо Князя, Константина Острожского, Воеводы Киевского, Маршалка земли Волынской старосты Володымирского, к Ипатию, Епископу Володымирскому и Берестенскому, и ответы Епископа

II. Письмо Князя, Константина Острожского, Воеводы Киевского, Маршалка земли Волынской старосты Володымирского, к Ипатию, Епископу Володымирскому и Берестенскому, и ответы Епископа

Лист Княжати Его милости перший дати з Люблина Июня 21 дня року 1593.

Велебный, милостивый отче, Владыко Володымерский, Господине и приятелю мне вельцеласкавый.

Всяк человек, во всем времени жития своего, по спасении своем, должен есть тщатисе о сем, дабы мог быть размножителем и любовником фалы Божее. А ще же кто и до конца быть не может, ино, абы приобщителем, альбо участником быть мог, и я иж, за великими трудностями моими, маючи на собе бремя тяготивнншних вещей, хотя-ж не мог быть конечным милосником, и упразнителем, альбо забавцою, около помноженыя фалы Божее, однак же повинности моее християньское от давных часов была у мене хуть такая, которая и до тых часов еще неустает, и овшем ее роспаляет, а бых в таком упадку, знищенью и опущенью матки нашое церкве, светое, соборное, Апостольское, Восточное, угляжовал и розваживал и размышлял, упатруючы и вынайдуючы такий способ и початок и приступ, через который бы Церковь Хрыстова, всих церквей началнейшая, до першого своего пункту, целю и клюбы, прийти и застановити могла. Але як вижу достойными достойная созидати ее, и честными честная совершати ее обыче, и презгодных людей годные речы бывают справованы. Так же и мне, або в том несчастье загородило, а боли теж негодность в так высоце фалебных речах не допустила до того прийти, же бым куначалу якому благому тое речы повод слушный взяти мог; однак же я пред се почувалом в собе залог письма светого мовячого, сила Божия внемощи совершается, и зась от человек не возможная, Богу возможна суть на которые слова, яко на напевнейшый цел, пиледаючы, мало прешедших времен, не славы ради житейское, Бог весть, но не токмо ситующы падения церкве Хрыстовы, але и на ругания ради Еретик, и тых самых отторгнувшысе Рымлян, яже иногда нам, беша братия, дерзнув або важыл се есми был спасевином Папы Рымского о некоих нужных речах писания светого, не сам, но своими старшыми и презвитери совитоватни гадательствовати. Богу же неизволившу, нашея ли ради пользы, и блага, или зла, не вем, и тако собысть се, яко годе Богу, бе. Я и тепер не могучи устать от такового тщания, яже о церкве Божые лмаючы, тот пред се взятя своего умысл, абыж до там тых краин, в которых по недалеку обретает се и Папа Рымский, для улеченья здоровя своего телесного, на час некоторый отехать мог, там же, если бы было на то прозволение Божие, до того, если бы была на то воля вашей мости, нашых Духовных, жебы сте вельможы теперь на том соборе вашом духовным вси одностайне о том промышляли и радилы и на мовяли, абысе мог такий прыступ вынайти до такового поводу, через который бы ее могли склоняти початки, дозгоды, и улацненья, и померкованья; так великих незгод и заятреня а праве внутр нее брани вцеркве Божой. Где был и я, втых краех будучи, за помочью Божею, и за началом и благословенством Вашей мости, яко духовных, не за нехал з щырости и хути моее против церкве Божой старанья, я зна болшым усилованьем моим, такового чинити, якое бы можность и годность моя зносити могла, иж бы се доякое слушное згоды изедноченья схилиты могло. Якож здаетми се за реч слушную, же бысь вельможне-милостивый отче, Епископе Володымерский, сам, особою своею намовившыся, з его милостью преосвященным отцем Архиепископом, из их милостью, велебными Епископы, до Великого Князя Московского, за дозволеньем и листом Его Королевское милости, ехать працы не литовал, а там с Князем Великим Московским и з духовными земли тамошнее, порозумевшысе и достаточне намовивши, и оказавши и донесши то им все якое гонение, преслидованье, и нарушенье и уничтоженье народ тутошний Руский, впорадках и канонах, церемониех церковных терпит и поносит, просечы и уживаючи их, абы о том тщание сотворившы, яко уды единое главы Христа, един единому с страждающе, купне и едьностайне з нами, так тому забегили, и вто тряфяли, же бы больше церков Христова такого разорванья, и внутрнего замешания, и народ Руского рожая, гонения и озлобления нетерпел. Пильне о том Вашу мость, яко вельцеласкового Господина и прыятеля, паче же, тщателя теплого влюбве веры Христовы, прошу абысь Ваша мость, хутливе до того се вложити, и за то се всею силою и моцью взяти, и там на том соборе спильностью старатисе веспол з их милостью рачыли, же бы який слушный початок и застановенье, если бы юж не до, якое згоды што есть, реч напреднейшая, себо рече: коль добро и коль красно, но еже жити братии вкупе. Тогды кто потом неподлейшая до полепшенья животов людьских, застараньем и початком Вашей мости мог, бо то есть явно вам мостям всим, яко се люде нашое релии згоршили, и так сут внабоженствах своих оспали, лениви недбали, иж не только, абы мели постерегать повинности своее християньское, и застановятися за Церков Божую и за веру свою старожытную, але еще се сами многие насмеваючи знее и опускаючи, до розмаитых сект утекают, чому, если Ваша мость забегати, и о том дбати не будете, и сами Ваша мость ведаете, хто за то слово и ответ воздати будет повинен, кровей бо рече их отруку вашею изыщу. Вы бо есте вожди, наставници и пастуси паствы Христовы, и ни для чого иншого нирозмножылося межы людми такое ленивство, оспальство, и отступенье от веры, яко на большей для того, иж устали учители, устали проповедачы слова Божого, устали науки, устали казанья; А з тым наступило знищенье, и уменшенье фалы Божое, церквей его, наступил голод слуханья слова Божого, наступило за тым отступенье от веры и закону, прышло на остаток на нас тоиж юж незостает нам на мнейшее речы, скоторое бых мосе тешити взаконе своем мели, лучше бысь мо тепер могли слова пророцкие вспоминати, мовечы— хтож дасть голове нашей воду и очыма нашыма источник слез, абых мо могли оплакивати упадку изнищенья веры и закону своего вдень и вночы, все опроверглосе, упало, зо всих сторон скорб, ситование и беда, и если се далей почувать не будемо, Богу весть, што знами за конец будет. Я зстороны моее повторе и потрете прошу, Бога ради, так Ваша мость, для повинности своее пастырское, яко и для боязни и помсты Божое вто потрафяйте, же бысте там што доброго справити и застановити, и початок який добрый уделати могли. Прочееже, вздравии телесном, и вдуше спасительном пребывании долгоденствовати, от Господа Бога Вашей мости желаю. Писан у Люблине, месяца Июня 21 дня року 93.

В.М. зычливый приятель, сын и слуга послушный,

Костантин, Княжа Острозкое, Воевода Киевский, власною рукою.

При котором листе послал, его милость, Пан Воевода, и артикулы, своею власною рукою написанные до тое единости, што бы вней вировати потреба было.

А то суть тые.

а

На первей; абых мо при всих обрадках своих, яко церков восточная держит, вцале зостали.

в.

Абы Панове Рымляне церьквей наших и наданя их на свое Костелы не оборочали.

г.

Абы за постановеньем згоды, если бы се напотом хто знаших до Рымского Костела удати хотел, не прыймовали, а ни примушали, Азвлаща при отдаванью малженства, яко то звыкли чынити.

д.

Абы духовные наши втаковом же пошанованью, яко и их были, азвлаща Митрополит, и владыкове враде и на Сеймиках местце мели, хотя не вси.

е.

Потреба бы и Патриархов обослать, же бы се до згоды склонили, же бысь мы единым серцем и едиными усты Пана Бога хвалили. Потреба и до Московского и до Волох послати, же бы се на одно знами згодили, аздалобы ми се наслушней до того ужить до Москвы, его милости, отца Епископа Володимерского, а до Волох, отца Епископа Львовского.

п.

Потреба теж поправить некоторых речей в церквах наших, азвлаща около сакраменту и иншых вымыслов людских.

з.

О закладаньи школ и наук волных, азвлаща для цвиченья духовным, пильно потреба же бых мо мели учоные презвитери и казнодее добрые, бо за тым, иж наух нет, великое грубианство внаших духовных умножилося.