108. О СЕМ, КОГДА В ЦАРСТВУЮЩЕМ граде Москве Патриаршеский Престол устроися.

108.

О СЕМ, КОГДА В ЦАРСТВУЮЩЕМ

граде Москве Патриаршеский Престол устроися.

БОЖИИМ ПРОМЫШЛЕНИЕМ, благочестию в Великороссийском Царствии яко солнцу посреде круга небеснаго сияющу, при благоверном Великом Государе Царе и Великом Князе Феодоре Ивановиче, всея Великия России Самодержце, прииде в Царствующий град Москву Святейший Иеремия, Архиепископ Константинополя, новаго Рима и вселенский патриарх, ради потреб духовных; егоже пришествию приснопамятный он Царь с прочими подручными своими зело рад бяше, и нача мыслити в себе, како бы в пришествие сие толикаго Первопрестольника, устроился из Митрополии Великороссийския превысокий Престол Патриаршеский, наипаче в примножение почести Святыя Великия Соборныя Успения Пресвятыя Богородицы Церкве и Первопрестольников Российских, великих Святых чедотворцов Петра, Алексия и Ионы, и в украшение Царствующаго града Москвы и всего Великороссийскаго Царствия единаго православнаго. Яви же тое помышление свое Синклиту своему Царскому и освященному Собору, потом и Святейшему Патриарсе Иеремию. Он же слышав таковая от благочестиваго Царя, воздаде хвалу Богу в Тройце Святей славимому и с всеми похвалив тую Богом устроенную мысль и изволение Царское о Толиком преизящном деле, суди достойно быти Патриарху в Великороссийском Царствии, аки в третием Риме, вместо Папы ветхаго Рима; да оттуду совершенное благочестие наипаче во всей вселенной прославляется. Тем же по благодати пресвятаго и животворящаго Духа, желанием благочестиваго Царя, Святейший Иеремия, Патриарх Константинопольский, по Правилом Святых Апостол и Богоносных Отец с советом всего освященнаго Собора Великороссийскаго и Греческаго Царствия избрал и возвел на превысокий Престол патриаршества Царствующаго града Москвы Преосвященнаго Иова, Митрополита Великороссийскаго, в лето от создания Мира 7097, а от рождества Христова 1589, Генваря в 26 день; и от того времени по смотрению и строению неизреченных судеб Божиих в Великороссийском Государстве в Царствующем граде Москве в Велицей Соборней Успения Пресвятыя Богородицы Церкве Патриаршеский Престол устроися, егоже потом и прочии Святейшии Патриарси с Константинопольским, Александрийский, Антиохийский и Иерусалимский грамматами своими укрепиша, и все согласно то утвердиша, да Святейший Патриарх Московский вместо ветхоРимскаго будет пятый Патриарх, и да имеет всеконечне Патриаршеское достоинство и честь равную с прочими православными Патриархами на вся веки. Сеже по смотрению Божию бысть, да по Христе, главе Церкве, изобразуется аки пять чувств содержимыя наипаче в главе, пять Патриархов, им же проображает древнейшаго языка Греческаго слово, знаменающее главы, KAPAI, в немже К сказует Константинопольскаго, А Александрийскаго, Р Российскаго вместо Римскаго, А Антиохийскаго, I Иерусалимскаго Патриархов.

Лета от рождества Христова 1432 Князь Свидригайло име в своей власти Киев и сам в нем бе. Лета от рождества Христова 1440 Казимир Ягелловичь, сущи Великий Князь Литовский, даде Киев и его Княжение сынови Владимира Олгердовича Александру, или Олелкови Князю, от негоже колена Слуцкии Князие Олелковичи поидоша. Преставижеся сей Князь Киевский Александер, или Олелко Владимировичь, внук Олгерда, Великаго Князя Литовскаго, лета от создания Мира 6963, а от рождества Христова 1455, оставльши по себе два сына, Князя Михаила и Князя Симеона, емуже Король Польский и Великий Князь Литовский Казимир от себе даде Киев во владение; а сей благоверный Князь Киевский Симеон Олелковичь обнови Великую Церковь Успения Прествятыя Богородицы Печерскую, разоренную и в запустении бывшую от нашествия злочестиваго Батыя чрез долгое время, едва не от основания воздвигши, украси ю всякою красотою и различными шарами (красками) росписа, в нейже и сам погребен бысть в гробнице, юже сам созда.