ПОВЕСТЬ О ПОСАДНИКЕ ДОБРЫНЕ

ПОВЕСТЬ О ПОСАДНИКЕ ДОБРЫНЕ

Синодская редакция^{3}

Чюдо Крестителя Господня Иоанна о новгородцком посаднике

При державе благочестивых великих князей Руския земли Великого Новаграда напроди живяху свободственно и с прочими окрест сущими иноплеменными странами в мире и совокуплении. Тогда оубо ближайший тамо сожителие, иностранницы латинския веры прислаша в Великий Новград от седмидесят градов своих, моляху архиепископа Великого Новаграда, посадников же и тысещников и всех града того народников, глаголюще им с прилежанием и со обычным прошением: «О, приятнии и ближайший соседие наши, дадите нам место посреде града вашего, идеже созиждем божницу по обычаю и вере нашей». Великаго же Новаграда людие, слышавше сия и совет сотворше, отрекоша им, глаголюще: «Милостию Творца нашего Бога и Пречистые Его Матере, благословением же и молитвами владыки и пастыря нашего архиепископа града сего, во отечествии государей наших великих князей руских, в Велицем сем нашем Новеграде, водрузишася и есть вся церкви православныя нашея веры, то оубо ныне кое причастие тме к свету. Тако и вашей божнице, по вере и обычаю вашему, како возможно быти во граде нашем?» Слышавше же сия, латыни в печали быша о сем. Паки же оубо врагоу и супостату подстрекающу я оумышляют окаянии отступницы правыя веры нашея и подходят ласканием и дары многими некоего от посадник, Добрыню прозванием. Он же обещася им крепце о сем побарати и наоусти я, да глаголют в народе, сице рекуще: «Аще вы, друзи наши, не дадите нам место во граде своем на здание божницы нашей, сице и мы сотворити восхощем, да не будут церкви ваша во градех наших». Сия оубо слышав окаянии латыни радостни быша. Время же обретше, паки внидоша в сонмь народа, глаголют им, наущенная посаднича словеса. Народи же, слышав сия их речения, недомышляхуся, но обаче размыслив, начата молити архиепископа, да благословит их дати место во граде, идеже тии изберут, на поставление божницы их. Помощь же подаяше им многу, мздоимныи народник Добрыня глаголя сице: «Аще не дадимы мы места божнице латынстеи во граде нашем, то оубо и в латынских градех разоритися имут церкви наша, от сего зелна нужда имать нам быти». Архиепископ же, не могии презрети людскаго прошения и посаднича споможения, преклонися воли их и повеле: «Да дадут место во граде на поставление ропате латыньстеи, идеже избрав вдаст им посадник Добрыня к потребе их». Тогда оубо латинское соборище возрадовашеся радостию велиею зело, яко оулучиша хотение свое. По времени же исхождаху, смотряюще места к потребствованию своему, но обаче оубо паче многих мест избраша едино место нарочито, близ суще торга, идеже бе церковь древяна великого Пророка и Предтечи, Крестителя Господня Иоанна, и возвестиша посаднику оному, яко угодно есть к потребе их. Той же оумовредныи мздоприятель ослепи очи свои и сердце омрачи златоприятием, и забыв день судный, не имея страха Божия, оуготовляше им дати место оно по злому их изволению, и тако повелевает церковь святаго Предтечи Иоанна с места оного пренести, а оно святое место отдати поганым латаном под скверную божницу. О, прелести человечестеи скудооумне, кто оубо не дивится или не оужаснется таковому злодерзию скверноприятнаго посадника оного, како оубо испоруга православную свою веру и в посмех вдаде латином злата ради, церковь Христову изгна, а еретическое капище вместо оноя прият. О, суеоумне народниче, како оболстися злата деля вместо поборателя противник зол явися Христове церкви. О, злато многопогибелное, хуждьшее нерсти и праха, изгубльшее сего суемудренаго, и со Июдою причетшее, той оубо Христа преда, сей же церковь его, той оубо со июдеи совещася, а сей с латаны, той оубо шед оудавися, а сей водою истопися, той оубо от апостол отлучися, а сей, християнския кончины не оулучив, скончася, том оубо от всех проклинаем есть, а сей от всех правоверных непоминаем бысть, оувы, яко християн сыи измени божественный храм на еретичю ропату. Но о сих изрекше, преже реченная совершаем. Тогда оубо великий пророк высочайший и честнейший всех Предтеча и Креститель Господень Иоанн зрит свыше божественыи свои храм злым мздоимцем испоруган и с святаго оного места пренесен, изволи отмстити златолюбцу оному. И в нощи той явися богоснабдимаго храма своего пономарю, глаголя сице: «Заоутра дне сего, яко при часе третием, иди к великому мосту, повелевая народом собратися на великий мост, зрети хотящее быти чюду». Минувши же нощи изыде пономарь, по гласу божественнаго Предтечи, вещая реченная людем. Тогда множество людии стекошася на на-рекованныи мост, чающи зрети неведомое видение. Якоже бысть время, прежереченныи посадник, злоименитыи среброприятель, ла-тынскии поборник, Предтечеве церкве испоругатель, христианский посрамитель, лихоименительныи Добрыня собрався с погибелною си честию, по обычаю своему с рабы его, вседе в насад, хотя реку плыти и ити к дому своему. И бысть егда пловущим им абие воста буря зелна и ветр противен и дотолика, яко оубо подъемшуся насаду оному выспрь вышьше двою сажении и оттуда низ падшуся в воде и, пребывшу дондеже погрязе и истопе многоплачевное тело посадниче. Тогда оубо совершися давыдское проречение, яко изыде дух его и возвратится в землю свою, в той день погибе все помышление его и яко овца во аде положен суть, и смерть оупасе и, егда оумре, не оставили вся, но ниже сниде с ним слава его. Народи же, видевшей сия, оужасни быша, зряще Божие грешным наказание и помышляше кииждо их о своих согрешениях и к покаянию тщащеся, и моляше милостиваго Творца своего, да оущедрит милосердие свое на них и подаст им время исповедания и грехов прощения. Тогда оубо сплавляющий с посадником онем оутопати в реце хотяше и абие превозники изяти быша от воды, дондеже здравие получив, благодаряше Бога, отхожашу в домы своя. Тело же посадниче, многи мрежи ввергше, едва извлекоша от воды, его же и погребению християнскому не сподобиша. Сия же слышавше возлюблении накажитеся добро творити, а не зло творити, душю спасти, а не погубити, бывающе не мздоимцы, ни лихоиметели, но правде и целомудрию любители, наказующе себе самех от божественных писании и от чюдес Христовех и Его угодников. Паче же и от сего предтечева чюдесе, прочитаемого днесь на всечестные его и святыи праздник во ушеся всем вам, елико слышахом и разумехом, и отцы наши поведаша нам, не оутаися от нас, чад их в роды сия возвещаем во хвалы Господня и силы Его, и чюдеса Его ныне и присно и во веки веком. Аминь.

Чюдо о Cnacoee образе воображением на латыньстей ропате, поставленней на месте, идеже бе стояла церковь Иоанна Крестителя в Великом Новеграде.

Господь Бог наш Исус Христос во дни древния сотвори в людех своих знамение предивно и всякаго оужаса исполнено в наказание правоверным; еже бы не смешатися им, ни очесом приближитися к скверным латином. О сем бо бысть чюдо преславно в Рустеи земли в Великом Новеграде, содевшееся сице, егда убо святаго пророка и Предтечи Крестителя Господня Иоанна божественную церковь Великого Новаграда посадник злоименитыи Добрыня, мъздою от ла-тын ослепленный, повеле на ино место пренести и место тоя святыя церкви отда скверным латином на поставление поганей их ропате. Тогда оубо сии окаяннии по злому своему изволению ропату си оустроиша по вере и по бычаю своему. И еще они сквернии недоволни быша обруганием святаго храма божественнаго Предтечи, еже с места его пренесением и своей ропате на том месте поставлением, но яко змии распыхахуся серцы своими, еже бы ино что им сотворите поношение православным. И издавше скверные свой смысл яве, оумышлением сицевым, повелевают оубо наимше иконных изуграфов вообразити их шаровным художеством и вапным надписанием образ Господа Бога и Спаса нашего Исуса Христа на ропатнем своем оугле с полуденныя страны, яко бы тому поклонитися християном. Сему же тако бывшу, писарие оубо наимшеся живописаша образ Исусов, но бес повеления епископля. И яко совершиша образ писменем, отъяша же и закрыв, имже бе задено оно живописательство. Тогда оубо от чюдеси преславну и многому оужасу исполнену, напрасно абие внезапу от воздуха сниде дождь велии и град крепкии и изби все живописательство образа Спасова и измовено сотвори, якоже дотолика поне ни левканию остати на месте оном. И сеже слышавше града оного народи в страсе и в радости бывше хвалу Богу и благодарение возсылаху, яко того божественным смотрением и молитв ради великаго Предтечи снесение церкви его с места мсти окаянному злохищнику оному истоплением в воде, а сие чюдо во обличение безбожным латином сотвори, правоверным же в болшее наказание и в крепкое оутверждение сия обоя оустрои. Вонмите оубо опасно о сем православия соблюдателие слышащий сия, иже не приобщатися нам ничимже к скверным и безбожным противникам закона Христова латином, яко оубо и Творца нашего образ на скверней их ропате аще вообразися и сие неоугодно Богови быти вменися. Емоу же слава со Отцем и со Святым Духом ныне и присно и во веки веков. Аминь.

* * * 

Повесть о посаднике Добрыне

Волоколамская редакция^{4}

Повесть древних лет, яже содеяшасъ в Великом Новеграде. О посадники Добрыне

В лета благочестивых великих князей наших руских, живущим Новгородцем в своей слободе и со всеми землями в мире и совокуплении, прислаша Немци от всех седмидесяти городов посла своего. Биша челом архиепископу Новгородскому, и посадником, и тысяцким, и всему Великому Новугороду, глаголюще: Милые наши соседы! дайте нам место у себя посреди Великаго Новагорода, где поставити божница по нашей вере и обычаю. И новгородци отмолвиша им, рекуще: «Милостию Божиею и его пречистыя Богоматери и отца нашего господина архиепископа благословением и молитвою, у нас в вотчине господы нашей великих князей Руских, в Великом Новегороде, стоят все церкви православные нашиа веры христианскиа, ино кое причастье свету ко тьме, також и вашей божницы быть как в нашем граде?» Бе же тогда посадник степенный Добрыня именем, и немци слышавше жестокий ответ от архиепископа и от всего народа, и своим лукавством биша челом посаднику Добрыне и даша ему посул велик. О сем бо и Соломон рече: все послушают злата. Посадник же Добрыня и с злыми своими советники повеле немцом говорити старостам купецким и купцем новгородским: толко нашей божнице храму святых верховных апостол Петра и Павла не быти у вас в Великом Новегороде, и то вашим церквам у нас по нашим городам не быти ж. И то слышавше старосты купецкие и все гости новгородские начаша бити челом господину своему, отцу архиепископу имя рек и всему Великому Новугороду, рекуще: пожалуйте поволите немцом поставити ропату по их обычаю и вере, и место им дайте, где полюбят, зане же не будет их божницы зде, ино нашим церквам у них не быти. Та ж и посадник Добрыня за старост и за гости начат говорити: толко не будет наших церквей по немецким городам, ино нашим гостем новгородским велми будет нужно; и архиепископ и новгородци послушаша посаднича совета и гостей своих челобитья, поволиша немцом поставити ропату, а место им укажет посадник, где будет прилично. И немцы избраша себе место посреди града в торгу, где стоит церковь древяна святаго Иоанна Предтечи. Посадник же Добрыня ослеплен мздою и научен диаволом, повелел церковь святаго Предтечи снести на ино место, а то место отвел немцом. Предтеча же Господень не терпя вражия навета и его злаго советника, что испо-ругал святый его храм мзды ради. В нощи убо той услыша пономарь тоя церкви Предтечевы глас, глаголющ ему: заутра на третьем часу дневном иди на великий мост и повели новгородцем смотрити Добрынина посаднича чюда. И пономарь заутра возвести новгородцем, яко же слыша. И абие стекошась множество народа на великий мост видети, что хощет быти. И какоже поеха посадник Добрыня с веча к своей улице чрез Волхов в насаде с людьми своими, и внезапу прииде вихрь, и взем насад, възнесе на высоту, яко боле дву саженей и удари о воду, и ту потопе посадник Добрыня ко дну, а прочих всех переимаша в судех въ малых перевозники, и тако неводы, мрежами и ужи едва възмогоша вывлещи тело его из реки. За свое лукавство не получи и погребения, яже есть обычай православным.

Сия ми поведа игумен Сергий Островского монастыря от святаго Николы, отец Заикхиев, нынешняго игумена Хутынского.

О той же ропате.

И якоже съвръшиша немцы ропату свою и наяша иконников новгородских, и повелеша им написати образ Спасов в ропатнем углу, на полуденной стране в верху, на прелесть християном и на соблазн. И якоже написаша иконописцы образ Спасов на ропате, а архиепископа не доложа, и открыша покров, и абие вскоре том часе прииде туча с дождем и с градом, и выбило градом и место то, идеже был написан образ Спасов, и левкас смыло дождем, яко же не явитись ни знамению. Писания сия же до зде.

Данный текст является ознакомительным фрагментом.