ГЛАВА XIV О крестном целовании а в ней 10 статей

ГЛАВА XIV

О крестном целовании

а в ней 10 статей

1. Которым Московскаго государства всяких чинов русским людем доведетца по судным делам изо всех приказов крест целовать, и им или за них людем их крест целовать в розных исках трожды. А возрастом бы те люди были, кому целовати крест, в дватцать лет, а меньши дватцати лет не целовать и ко кресту таких не припускать. А у кого таких людей не будет, и им за себя целовать крест самим.

2. А будет кто сам, или за кого люди его поцелуют крест в розных искех трожды, а после того будет кто учнет на нем чего искать, или он сам на ком чего учнет искать, а по тем делам дойдет до веры, и похочет он в и(ы)сцове, или в своем иску крест целовати в четвертые, и то дело вершить сыском, а крестнаго целованья в том деле ему не давать. А будет про то дело сыскать нечем, и то дело розымать пыткою.

3. А будет на русских людех учнут искать литва, или немцы, или татаровя, или иные всякие иноземцы, а в том их иску доведетца крест целовать русским людем, а иноземцом крест ставить, и русских людей в и(ы)ноземцовых искех ко кресту приводить в приказех, где которой иноземец учнет искати, а крест для того держати в приказе написав на иконе. Так же будет и русской человек учнет искати на иноземце, а к вере доведетца приводити иноземца, и иноземцов к вере приводити по их вере в приказех же.

4. А которой человек Московскаго государьства взыщет на чюжеземце чего нибудь, и чюжеземец в том его иску даст ему на душю, и он в том своем иску похочет крест поцеловать, и ему в том дать на волю. А будет он в том своем иску креста поцеловать не похочет, или на нем на самом учнет чего искать чюжеземец, а он в том чюжеземцове иску креста целовати не похочет же, и учнет бити челом, чтоб ему с чюжеземцом в вере дати жеребей, кому крест целовать, и им в том дати жеребей, и чей жеребей выметца, и тому поцеловав крест, свое и взяти, или отцеловатца.

5. А которым людем исцом, или ответъчиком доведетца целовать крест, и ко кресту приводить самим, а людей у них нет, и те исцы и ответчики сами будут меньши дватцати лет, лет в пятнатцать, а переменитца им будет неким, и тем исцом и ответчиком по неволе крест целовать, и ко кресту приводить самим, хотя кто и меньши дватцати лет. А меньши пятинатцати лет никому креста не целовать, а целовати за них крест тем, кто за них в суде будет. А наемным людем и подставою креста не целовать, и ко кресту не приводить никоторыми делы.

6. А быть у крестнаго целованья дворянину да подьячему, для береженья из сотен целовалником. А крест целовати исцом и ответчиком в своих искех в сентябре, в октябре со 2-го часа по 6-й час дни; в ноябре, в декабре, в генваре, в феврале с 1-го часа по 5-й час дни; в марте, во апреле, в мае, во июне со 2-го часа по 7-й час дни; во июле, во августе с 3-го часа по 6-й час дни; а после указных часов и в вечере креста не целовати. А велети исцом и ответчиком у крестнаго целованья ставитися три дни. А которые люди истец или ответчик у крестнаго целованья на третьей ставке не станет самовольством, без челобитья, или и станет, да во указныя часы креста не поцелует, или кто кого в те часы ко кресту не приведет, и того тем обвинити.

7. А которые люди учнут на ком искати своих исков, а в жалобе напишет того самого, до кого ему будет дело, до человека его имянно, и ответчик возмет на душю человеку своему, и имя тому человеку скажет, и в таком деле крест целовати ответчикову тому человеку, которой его человек будет в жалобе написан, а не тому, кого тот ответчик в суде имянем скажет.

8. А которые исцы ищут на ответчиках рублев трех сот и больши, а на суде даст ответчик на душю исцу, и в том иску крест целовати одному человеку, кому ответчик поверит. А будет ответчик возмет на душю своему человеку, и в человеке дати на волю исцу, кому истец поверит. А кто на ком ищет не сходя с суда по двум или по трем челобитным разных исков, а ответчик в тех во всех искех возмет себе на душю, или даст исцу на душю, а опричь веры крестнаго целованья тех дел вершити будет нечем, и в тех искех ответчику, или исцу крест целовати во всяком иску порознь.

9. А кто крест поцелует, или кто кого ко кресту приведет не на правде, и сыщется про то допряма, и тем людем за то чинити жестокое наказание, против того, как о том писано выше сего в суде о крестьянех.

10. А в правилех Святых Отец про крестное целование написано. Будет крестьянин крестьянина напрасно приведет к крестному целованию, и велит крест поцеловати, и он крест поцелует на том, что он прав, и таковаго по нужди кленьшагося великий Василий на шесть лет запрещению подлагает, сиречь от церкве отлучает, по осмьдесят второму правилу своему.

А будет велможа крест поцелует, или велит кому иному крест поцеловати накриве, и таковых священником в церковь Божию не пущати и в домы их не приходити, и Божественаго пения в домех у них не пети. А будет поп учнет в чьем нибуди дому Божественое пение пети, а такия ротники, которые учинили крестное целование накриве, тут же будут, и их из тоя храмины вон выслати. А кто крест поцелует накриве, и тому великий Василий в шестьдесят четвертом своем правиле полагает запрещение на десять лет, два лета да плачется, три лета да послушает Божественных Писаний, четыре лета да припадает, и едино лето да стоит с верными и потом Божественнаго причащения причастится.

О томже царя Льва Премудраго новая заповедь 72-я повелевает кленущемуся во лжю язык урезати, аще после обличен будет. А кто покаяния просит, и поп даст ему заповедь на та лета, в понедельник, в среду, и в пяток единою днем ясти хлеб с укропом, во вторник же и в четверток дважды с варивом без масла. И того ради подобает отцем духовным детей своих духовных поучати и наказовати страху Божию, и чтобы промежю себя и в соседстве жили любовно, не крали, и не разбивали, и не ябедничали, и на лжи не послушествовали, и чюжаго не восхищали, и сами не обидили, и скверными речьми не укорялися, и накриве бы креста не целовали, и именем Божиим во лжу не ротилися и не клялися, занеже православным християном крестное целование ротою и накриве в конец отречено бысть священными правилы, но вдан от Христа християном крест на освящение и просвящение и на отгнание врагов видимых и невидимых, и того ради православным християном достоит святому кресту верою покланятися и истинною, и чистотою, и того честнаго креста целовати со страхом, и с трепетом, и с чистою совестию, и целуяй тако крест освящает себе и от болезни и от недуг всяческих исцелевает. А не верою и не истинне на лжи целуяй крест, и той бо лжи обещник есть, и не исцелно вреждает себе, и по Писанию яко христоубийца вменяетца таковый поругатель честному кресту. Всего злее преступати крестное целование, и целовати святыи крест, или икона Святыя Богородицы, или иного Святаго образ. Се бо видев Захария пророк, сходящ серп огнян с небесе на землю, и вопроси, что есть Господи серп сей; и рече, гнев Божии есть, посылается от руки Божия на тех, иже ходят накриве к роте, да поженет пламень их, и душа предастся огню негасимому.

Да и в выписях к крестному целованью сию статью из правил Святых Апостол и Святых Отец по всем судным делам писать, и велеть тое статью у крестного целованья подьячим вычитать истцам и ответчиком при многих людех вслух, чтобы про то всякие люди ведали, как про крестное целование в правилех Святых Апостол и Святых Отец написано.

А которые люди к кому приставят не в больших искех, в рубле или меньши рубля, и тем давати к и(ы)ску их жеребей. А кто учнет искати болши рубля, и в том иску давати крестное целование.